طبيب مصري يروي تجربته مع فيروس كورونا.. بداية من إصابته وجميع أفراد أسرته.. مرورا بمرحلة العلاج.. حتى كتب الله لهم النجاة من الوباء القاتل
كتب الطبيب المصري حسام الدين محمود، تدوينة على موقع التواصل الاجتماعي فيس بوك، شرح فيها تجربته الكاملة مع فيروس كورونا، الذي أصيب به وجميع أفراد أسرته، ثم نجاهم الله بالشفاء من الوباء القاتل.
وجاءت القصة كما كتبها نصا كالتالي:
اللي نقلت العدوي ليا و لأسرتي بفيروس كورونا Covid- 19 ماتت بالفيروس.. ربنا يرحمها و يغفرلها.. و ده خلاني حريص إني أشارك معاكم تجربتي مع فيروس كورونا لأني شايف أن الناس ما بين مش فاهم حاجة و ما بين مش مقتنع و ما بين شايف أنه دور برد و هايخلص فبيتعامل مع الموضوع باستهتار.
الموضوع بدأ معايا من قبل رمضان بأسبوعين تقريبا بصداع مفاجيء و عنيف جدا جدا لدرجة القيء.. و استمر معايا 3 أيام.. بعدها بدأت أعراض برد و رشح شديد مناخيري ماتسدتش و مع ذلك حاسة الشم فقدت تماما.. حتي كتابة البوست ده الشم ضعيف.
بعدها بدأ الم في زوري شديد جدا جدا (جدا).. مع حرقان و أكلان.. نفس اليوم بالليل بدأت دم ينزل من فمي و أنفي و بدأ صوتي يتحول لصوت خشن أجش يدوب بدأ يتحسن من أسبوع.. كل ده أنا مستغرب بس مطمن أن هيا مش كورونا لأني مسخنتش خالص ( الحرارة مش شرط ممكن تسخن و ممكن لأ).
رمضان دخل و الأعراض بتزيد و صوتي خشن و مبحوح.. والدم مستمر و بدأت الكحة العنيفة مع ضيق التنفس وهمدان كأن مفاصلي مش شايلاني و نهجان في الكلام و الحركة البسيطة.. كل ده بردو مش حاطط احتمال انها تبقي كورونا لغاية ماحصل الأتي، هحكيلك حصل معايا إزاي عشان تعرف أنك لو مقفلتش علي نفسك وأخدت كامل احتياطاتك هيجيلك يعني هايجيلك و الله خير حافظ.
أخت زوجتي طبيبة أسنان.. المساعدة بتاعتها تعبت فجأة و اتحجزت فجأة واحتاجت تنفس صناعي.. ده خلاني أربط الأحداث و أشك و اعمل مسحة عشان اتفاجيء أن أسرتي كلها مصابة.. أخت زوجتي اتصابت من مساعدتها.. ونقلت لزوجتي.. ومن زوجتي لأخوها وليا و لبنتنا الصغيرة.. و مني أنا لشريكي و صديقي د أحمد.. ومن أحمد لصاحبه و هكذا.
كل ده و احنا محافظين علي الحد الأدني من الاختلاط فما بالك باللي مش حاطط في باله.. كل المخالطين دول بلا أعراض و لكن حاملين و ناقلين لفيروس كورونا اللي جالي و حتي اليوم مازلت بتعافي منه.. اتشخصت و بمجرد معرفتي أني و زوجتي و بنتي مصابين انتابني شعور اتمني أن محدش يعيشه و ياريت أنك تتجنب تعيشه.
شعور أنك نايم قايم و في كائن قاتل في زورك وصدرك ممكن تنام و تقوم علي جهاز التنفس منه علي قبرك.. مش أنت و بس .. لا أنت و أسرتك و ناس بتحبها و بتخاف عليها أكتر من نفسك.. ألم و قلق و كوابيس.. دول حالي اللي لازمني طول فترة العزل.
سلمت علي بنتي و زوجتي و مش عارف هشوفهم تاني ولا لأ.. شعور مؤلم ربنا يحفظكم.. كلنا الحمدلله ربنا نجانا لكن البنت المساعدة اللي اتحطت علي التنفس الصناعي ربنا توفاها بعد أيام من دخولي العزل.. ربنا يرحمها و يجعل مرضها شفيعا لها.
دخلت أنا مستشفي القصر العيني الفرنساوي عملت صورة دم كاملة و أشعة مقطعية علي الرئة CT و قياس نسبة الأكسجين في الدم.. الحاجات دي ممكن تعملها تطمن علي نفسك من غير مسحات.
- في صورة الدم بنشوف: Serum ferritin D dimer & CRPدول اللي اتعملولي في العزل (بيزيدوا في الإصابة).
- نسبة الأكسجين في الدم ممكن تعمله لنفسك بجهاز شبه جهاز قياس السكر كدة – اشتروه- مفروض ما تقلش عن 90-95 %
- أشعة علي الرئة لتبين الالتهاب الرئوي.
الحاجات دي لما تعملها مع الأعراض هاتعرف إذا كنت مصاب ولا لأ.
ده بروتوكول العلاج اللي الأطباء اتعاملوا به معايا داخل العزل:
- أول يوم هيدروكسي كلوروكين (بلاكونيل) 200 مجم قرصين كل 12 ساعة لأول يوم فقط.. و بعدين قرص واحد كل 12 ساعة طول فترة العزل ( 10 أيام).. بلاكونيل بيأثر علي القلب خلي بالك لو مريض قلب استشير دكتور لو مش مريض قلب هتحس أن قلبك مش مظبوط بس شعور مؤقت.
- Oseltamivir (Tamiflu) كبسول كل 12 ساعة طوال فترة العزل و خلي بالك ده مش أساس العلاج.. ده حاجة ثانوية عشان لو في انفلونزا الأعراض تخف عليك شوية ( ماينفعش تعتمد عليه بس).
-مخدتش Azithromycin زيثروماكس لأن فيه تعارض إلي حد ما بينه و بين بلاكونيل بس بناخده مضطرين لو فيه سخونة 250 مجم 2 كبسولة لمدة 6 أيام -أنا اخدته بعد طلعت من العزل لأن الأعراض مكنتش خلصت.
- قياس الحرارة و الضغط مرتين يوميا
- كل 24 ساعة pantoprazole كنت باخدها كل يوم الساعة 5 الصبح
- كل 24 ساعة كبسول source of zinc أوكتازنك
- كل 24 ساعة source of vitamin C كبسول سي ريتارد
- كل 24 ساعة حقنة Clexane كلكسان (لتجنب تكوين جلطات microthrombosis)
- الفطار (جبنة و لبن و خيار و بيض و زبادي )
- الغدا لازم يكون عالي البروتين high protein diet
- العشا زي الفطار
- لازم فواكة باستمرار مصدر للفيتامينات
- عصاير (مش ساقعة) باستمرار
- سوايل دافية كل ساعة من غير سكر (ينسون – تيليو – زعتر عصير ليمون بعسل )
راحة و نوووووووم علي قد ما تقدر
كنت بنام بال 20 ساعة متواصل كأني في غيبوبة.
- بيتعملك مسحات دورية و يتم التأكيد عند ظهور النتائج السلبية مرتين متتاليتين
المسحة بتكون مؤلمة جدا بتوصل للحنجرة من الأنف ( ياريتك ماتجربها).
العيد جاي و هتلاقي ضغط رهيب من جانب أصدقائك و عيلتك أنكوا تتجمعوا .. مش هحذرك كتير بس خلي بالك أن الغلطة هتساوي روح..
دمتم سالمين معافين..
